ياشعبي حبيبي ياروحي يابيبي ياحاطك في جيبي يابن الحلال
ياشعبي ياشاطر ياجابر خواطر ياساكن مقابر وصابر وعال
ياواكل سمومك يابايع هدومك ياحامل همومك وشايل جبال
ياشعبي اللي نايم وسارح وهايم وفي الفقر عايم وحاله ده حال
احبك محشش مفرفش مطنش ودايخ مدروخ واخر انسطال
احبك مكبر دماغك مخدر ممشي امورك كده باتكال
واحب اللي ينصب واحب اللي يكدب واحب اللي ينهب ويسرق تلال
واحب اللي شايف وعارف وخايف وبالع لسانه وكاتم ماقال
واحب اللي قافل عيونه المغفل واحب البهايم واحب البغال
واحب اللي راضي واحب اللي فاضي واحب اللي عايز يربي العيال
واحب اللي يائس واحب اللي بائس واحب اللي محبط وشايف محال
واحبك تسافر وتبعد تهاجر وتبعت فلوسك دولار او ريال
واحبك تطبل تهلل تهبل عشان مطش كوره وفيلم ومقال
واحبك تأيد تعضض تمجد توافق تنافق وتلحس نعال
تحضر نشادر تجمع كوادر تلمع تقمع تظبط مجال
لكن لو تفكر تخطط تقرر تشغلي مخك وتفتح جدال
وتبدأ تشاكل وتعمل مشاكل وتنكش مسائل وتسأل سؤال
وعايز تنور وعايز تطور وتعمللي روحك مفرد رجال
ساعتها حجيبك لايمكن اسيبك وراح تبقى عبره وتصبح مثال
حبهدل جنابك وأذل اللي جابك وحيكون عذابك ده فوق الاحتمال
وامرمط سعادتك واهزأ سيادتك واخلي كرامتك في حالة هزال
وتلبس قضيه وتصبح رزيه وباقي حياتك تعيش في انعزال
حتقبل ححبك حترفض حلبك حتطلع حتنزل حجيبلك جمااااال
من شعر أحمد فؤاد نجم
14 comments:
عزيزتي
------
كثيرا ما اسعدتني موضوعات ولكن هل كلمات بهذا المستوي هيا الحل لحال هذا البلد حتي ولو كانت كلمات معبره عن الواقع المرير الذي وصلنا اليه ولكن يعني لو ممكن تراجعي تاني الحديث الي انتي كتباه قبل الكومنتات اعتقد انه برده ممكن ينطبق علي البوست نفسه. احمد فواد نجم ليه اشعار يا فندم تخدش الحياء العام وهو انسان لايراعي في كلماته الحياء العام.
وحسبنا الله ونعم الوكيل.
اكيد عمنا الفاجومي مالوش حل فيما يقول ويكتب
المهم الغاية وراء الموضوع والهدف منه
يعنى ناخذ من الأمر ما ينفعنا ونترك ما نراه يخدش الحياء
تحياتى
هههههههههههههههه
لا تعليق سوى ضحكة حلوة دخلتيها عليا
تحياتى لك
ايه الكلام الي يودي لايمن نور ده
بس بجد جامد اوي
تسلم ايدك
أنا جاااااااااااي
احنا شعب عشق الغيبوبه والتفاهه
ومافؤاد نجم الا انسان تافه وغبي بالاحرى انسان خاااااااااااااايب
ودايما انا نصفق لاي شي معارض وبس لكن نحرك ساكن لاااااااا كان زمان وجبر
ياهند خليكي عاقله واكتبي شي راقي
متأكدة إنه أحمد فؤاد نجم؟؟
أصل كتير أوي ناس بتكتب كلام على طريقته بالظبط ويقولوا هو اللي قايلها
على العموم الكلام حلو برضه
سواء كان هو ولا لأ
تحياتي
س1:استخرج من القطعة علامات قلة الادب
س2: اذكر مواطن خدش الحياء العام فى القطعة مع تصنيفها
س3: اذكر علامات تفاهة وغباء وخياااااااااااااابة احمد فؤاد نجم مع الرسم التوضيحى
------------------
احمد فؤاد نجم
صوت البسطاء والفقراء والمهمشين
يا ريت حتى لما الشعب الطيب ده بيوافق بيتحب
ألاكله لب لب لب مافيش حب
اسفة على التاخير وشكرا جزيلا لكل من علق وان اختلفت الاراء كل ما فى الموضوع اننا سمعتها فى برنامج قلم رصاص على لسان حمدى قنديل وحبيت انقلها لكم لكن يظهر انها عملت مشكلة
واعذرونى على التاخير مشغولة فى الامتحانات ربنا ما يوريكم ادعولى
اختيار بجد راااااااااااااااااااااااااائع
بجد امتعتيني
زيزي
دي أول مرة أدخل مدونتك وبصراحة أكتر من رائعة انتي دماغك هايلة واختياراتك كمان جميلة قوي
باكون سعيد قوي لما اشوف حد بيفكر بالطريقة دي
اتمنى تشرفيني
السلام عليكم و رحمة الله
بجد وحشتينى قوى
اخبارك ايه؟
اما عن هذا الزجل
فلا تعليق
اعتقد انه معبر و اتفق مع التعليق الاول لrealman
Post a Comment